【去居酒屋必備】 不可不知嘅5件事 連新手點菜指南

0
5413

居酒屋係道地日本飲食文化嘅體驗,但係有啲規矩要跟番。所謂各處鄉村各處例,尤其去到日本依啲禮儀之國,緊係要留意下人地規矩入鄉隨俗,咁先玩得開心咖嘛!講到日本要留意嘅嘢,當然唔少得居酒屋嘅規矩啦。呢度有5大注意事項,基本居酒屋日文教學。想扮下日本人感受真正居酒屋氣氛,想知道入去要叫啲咩點樣叫,就要睇落去啦。

【閱讀更多】
【日本愈夜愈精彩】東京居酒屋入門精選-7大歡迎外國人嘅居酒屋推介
【東京懶人包系列】[第1彈] 2018 美食地圖 | 同場加映築地 + 居酒屋攻略 !

5大注意事項

お通し

居酒屋好多時都有「お通し」,又時會寫做「付出し」或者「突き出し」,指嘅係一入鋪頭店家就送上嘅小菜,有啲似酒樓送嘅花生,只係お通し無論食唔食都會收費,通常都係幾百日圓。依個係大多居酒屋不成文嘅規定,就好似俾貼士咁,俾錢嘅時候唔好誤會收多咗呀!

唔同居酒屋嘅お通し都有所不同,連鎖經營嘅通常係枝豆(如圖),小型啲自家經營嘅就大多會係店家煮嘅小菜,間間唔同,大家可以留意下。

查身份證

日本嘅合法飲酒年齡係 20 歲,所以有啲居酒屋會要求客人出示證件,就算唔打算叫酒飲都係要俾店員睇呀。不過亦有一啲主打一家大細嘅居酒屋,例如釣船茶屋ざうお就比較少依個情況出現啦。

室內吸煙

好多居酒屋係可以食煙,加上空氣未必好流通,煙味或者會有啲重。怕煙味嘅朋友可以要求禁煙席,或者揾啲禁煙嘅店家。唔少居酒屋店員係安排座位之前,都會問番客人有冇食煙,再安排適合嘅位置。

啤酒優先

入座之後,通常會先叫飲品,然後再慢慢睇餐單決定要食咩。而第一杯飲品通常會點啤酒,啤一啤之後先再叫其他飲品。

濕毛巾

居酒屋嘅小毛巾大多係重複使用,所以通常淨係用黎擦手,唔會擦臉或者擦嘴,更加唔好用黎擦枱。雖然店員唔會出聲阻止,但感覺上就唔太有禮貌啦。

 

點菜指南居酒屋 – 常見食物飲品

了解完居酒屋嘅須知,可以安心入去叫嘢飲嘢食啦…咦等等先,個menu全部都係日文啲平假名片假名,淨係識叫有漢字嘅嘢,或者叫完都唔知係咩?唔洗驚,等小編慢慢解釋俾你聽!

飲品

  • ハイボール

    即highball,指威士忌溝唔同味道嘅梳打水或者tonic water,常見嘅有角ハイボール,用suntory嘅角瓶威士忌溝成。變異版有焼酎ハイボール(チューハイ/酎ハイ),用焼酎代替威士忌,亦有コーラハイ,用可樂代替梳打水;有時則會用茶代替梳打水,溝出緑茶ハイ(綠茶highball)、ウーロンハイ(烏龍茶highball)等。
  • サワー

    即Gin Sour,用用琴酒等蒸餾酒溝唔同味道嘅蘇打水、果汁或茶而成,味道酸酸甜甜,酒精含量較低,常見嘅有レモンサワー(檸檬 Sour)、カルピスサワー(可爾必思 Sour )、キウイサワー(奇異果Sour)等。
  • カクテル

    即雞尾酒,例子有好多女仔都會叫嘅カシスオレンジ(Cassis Orange)。而ノンアルコールカクテル 則指Mocktail,冇酒精成份。
  • ビール
    啤酒。常見會提供嘅牌子有アサヒ(Asahi)同ザ・プレミアム・モルツ(The Premium Malt’s)。
  • ワイン
    葡萄酒。有「赤」字嘅係紅酒,「白」就係白酒。
  • ウイスキー
    威士忌
  • ノンアルコール
    非酒精飲品
  • ソフトドリンク
    Softdrink,同樣指非酒精飲品,包括汽水、茶、果汁等飲品。

串燒

  • やきとり盛合せ/焼き鳥盛合せ

    雞串燒拼盤。「盛合せ」指綜合拼盤,通常唔知叫咩揀唔到嘅時候,叫有「盛合せ」嘅食品就最穩陣!
  • とりもも
    雞脾肉
  • 手羽先

    雞翼
  • つくね

    雞肉丸
  • カルビ

    牛五花肉
  • 牛タン
    牛舌
  • 豚バラ

    豬五花肉
  • むね
    雞胸肉
  • ささみ
    雞柳
  • なんこつ

    軟骨

下酒菜

  • ポテトフライ
    薯條
  • チキン南蛮

    炸雞再加上由糖醋、蔥、芥茉同他他醬溝成嘅醬汁,味道帶點酸甜,令炸雞味道更豐富
  • キャベツ
    生椰茶,通常會加上沙律醬、麻油、鼓油等醬汁。有啲居酒屋嘅キャベツ會寫明「おかわり自由」,意思即係免費任添。
  • ポテトサラダ
    薯仔沙律
  • 牛すじ煮込み

    滷牛筋
  • もつ煮

    牛、豬、雞等內臟嘅燉煮料理,唔敢食內臟嘅朋友要留意啦。
  • キューリ漬
    醃青瓜

下面呢個係居酒屋常用日文教學,跟住讀, 學定兩句傍身啦 !

 

睇完介紹,係咪好想即刻去日本居酒屋呢?快啲睇埋東京居酒屋入門精選,plan番個食盡東京之旅啦!

【閱讀更多】
新加坡必到五間肉骨茶
韓國炸雞巡禮
【懶人必看】原宿竹下通 原宿周邊 必吃必逛盡推介!
【必收藏】東京駅食買玩必備!地下一番街地圖全攻略