【東京自由行】$33望住晴空塔嘆溫泉!熊本熊陪你浸 東京溫泉

0
666

Shirley又來介紹平靚正景點比大家喇!東京最近嘅溫度都係10°C以下,咁凍浸溫泉就最啱喇!不過天然溫泉通常都喺郊外,但其實東京市區都有天然溫泉!呢個 東京溫泉 喺晴空塔附近,啱晒去完晴空塔想浸溫泉休息下嘅人!而且最近仲有熊本熊嘅宣傳活動,成個浴場都充滿熊本熊裝飾,仲可以試到熊本縣嘅特色小食,更重要嘅係入場費只要HK$33!我覺得幾抵玩,想知道喺邊度就要睇下文喇!

1. 「錢湯熊本熊」活動 齊齊浸 東京溫泉

「錢湯熊本熊」活動只係舉行一個月,想去就要快喇!(圖片來源:官網)
「錢湯熊本熊」活動只係舉行一個月,想去就要快喇!(圖片來源:官網)

熊本縣最紅吉祥物熊本熊(Kumamon、くまモン)今次就來到東京墨田區嘅「押上温泉 大黒湯」,舉行期間限定「錢湯熊本熊」活動,由2019年2月6號開始至3月4號結束,為期大約一個月!

近期東京仲有期間限定嘅哈姆太郎cafe,鍾意哈姆太郎嘅人記得唔好錯過呀!
【大阪自由行】20周年紀念限定大阪景點!朝聖必去大阪哈姆太郎cafe

2. 到底咩係錢湯?


呢段影片可以見到押上温泉大黒湯嘅環境,浸溫泉之前記得好似熊本熊咁沖乾淨個身先去浸呀!

「錢湯」係公眾浴場嘅意思,係日本傳統文化之一,同一般溫泉唔同嘅地方係浸浴嘅位置無溫泉咁闊落,水質亦比較少用溫泉水,一般係用煲熱咗嘅自來水,所以錢湯嘅入場費亦比溫泉平好多。

以錢湯來講,押上温泉大黒湯嘅環境都算大,想平少少浸 東京溫泉 都係唔錯嘅選擇!(圖片來源:官網)
以錢湯來講,押上温泉大黒湯嘅環境都算大,想平少少浸 東京溫泉 都係唔錯嘅選擇!(圖片來源:官網)

不過今次舉行活動嘅地方「押上温泉 大黒湯」就係少有用天然溫泉水嘅錢湯,可以用平少少嘅價錢浸溫泉,又體驗到日本傳統浴場文化,我覺得雖然呢個地方感覺唔算大,不過以浸溫泉嘅價錢來講都算抵玩!

3. 滿滿熊本熊裝飾 熊本縣特色小食

比熊本熊包圍住浸溫泉,熊本熊fans(例如我!)肯定係東京必去行程!(圖片來源:官網)
比熊本熊包圍住浸溫泉,熊本熊fans(例如我!)肯定係東京必去行程!(圖片來源:官網)

喺「錢湯熊本熊」活動期間,錢湯內外隨處都可以見到熊本熊嘅身影,除咗牆壁之外,浴場用嘅膠兜都印有熊本熊嘅樣,另外浴場仲有用熊本縣特產「晚白柚」整成嘅番梘,可以一次過體驗東京溫泉及熊本縣特色!

左邊嘅係芥末蓮藕,右邊係即食糰子,想食熊本美食嘅人記得留意喇!(圖片來源:amazon、ポニッツショッピング)
左邊嘅係芥末蓮藕,右邊係即食糰子,想食熊本美食嘅人記得留意喇!(圖片來源:amazon、ポニッツショッピング)

活動期間亦會有熊本縣嘅觀光情報,現場仲會售賣熊本縣嘅飲品及小食,鍾意浸溫泉嘅人,尤其係熊本熊嘅fans一定唔可以錯過呀!

其實熊本縣都有好出名嘅天然溫泉,當地仲推出咗超抵玩溫泉套票,有諗過去熊本縣玩嘅人記得mark低喇!
【必睇必買必食】鄰近東京大阪北海道!5大日本天然溫泉及玩樂推介

4. 押上温泉大黒湯 交通

由押上站、晴空塔行過去都只係大約6分鐘步程!

去押上温泉大黒湯嘅話,記得要順便去埋晴空塔參觀呀!

晴空塔可以望晒成個東京嘅景色,值得一去!(圖片來源:klook)
晴空塔可以望晒成個東京嘅景色,值得一去!(圖片來源:klook)

東京SKYTREE®晴空塔門票
預訂網址:https://l.flynow.hk/klook-skytree-76bee

喺晴空塔附近仲有間貨品超平嘅批發超市,去完呢兩個東京景點記得過去掃平貨呀!
【東京大阪都有!】烏龍茶$3炭燒咖啡$2!日本隱世超平批發超市

「錢湯熊本熊」活動
活動日期:2019年2月6日〜3月4日
營業時間:(逢星期二休息)
・平日 15:00〜翌10:00
・星期六 14:00〜翌10:00
・星期日及公眾假期 13:00〜翌10:00
地址:東京都墨田區横川 3-12-14
入場費:大人 460円(大約HK$33)、中學生 360円(大約HK$26)、小學生 180円(大約HK$13)、幼兒 80円(大約HK$6)
官網:http://www.daikokuyu.com/index.html

5. 東京酒店

想去押上温泉大黒湯當然要揀返間交通方便嘅酒店啦!呢兩年都有唔少新落成嘅東京酒店,交通方便之餘,酒店設施亦比較新淨,咁就可以住得更舒服!
【東京自由行】頂層嘆露天spa!5間新開張東京酒店推介

 

【東京其他景點推薦】
【購物攻略】價錢超平仲可以退稅!東京必去超抵買零食店
【任摸任抱】最平HK$14可以入場!東京5間必去可愛動物cafe