【購物攻略】價錢超平仲可以退稅!東京必去超抵買零食店

0
1877

上次小編同大家介紹過位於大阪嘅零食批發店,入面嘅零食全部都超低價發售,不過其實東京都有一間超抵買嘅零食店!零食嘅價錢平過香港之餘,仲可以退稅,想去東京掃貨嘅你記得mark低喇!

認住呢個紅色招牌,到時肯定唔會搵唔到!(圖片來源:官網)

呢間零食專門店「二木の菓子」喺東京唔同地方都有分店,不過最多人去嘅一定係位於上野阿美橫丁嘅第一營業所,呢間店舖嘅零食種類最齊全,買手信送比朋友就最啱!隔離嘅分店ビック館除左零食之外,仲會有飲品、即食麵等,不過到底邊樣最抵買?小編幫你揀出10種最抵買嘅貨品,仲比較埋香港超市售價比你做參考,一齊睇下買咩係最平啦!

二木の菓子10大抵買貨品排行榜

第十位 UHA 味覺糖

40g UHA 味覺糖 ¥100(大約HK$7) (圖片來源:s3.com.tw)

呢款糖嘅果汁味超濃,連日本人都好鍾意買來食,雖然喺香港便利店都可以買到,不過喺香港買通常都起碼要HK$10一包,喺日本買就可以平少少。

比香港網上平:HK$3

第九位 百邦條裝

百邦條裝 ¥65(大約HK$4) (圖片來源:shopkeeper.oneteam.hk)

呢款強調可以一口食晒嘅零食,喺香港好多零食店都可以買到,不過售價肯定無喺日本買咁平,香港買通常都要HK$7.5,不過呢間零食買就只要HK$4!

比香港網上平:HK$3.5

第八位 Bourbon 百邦 – 帆船餅乾

55g Bourbon 百邦 – 帆船朱古力餅 ¥85(大約HK$6) (圖片來源:lingsik.com)

呢款餅乾一直係好受遊客歡迎嘅手信,香港有時都買到,不過通常都要HK$10一盒,喺呢間零食店就可以平少少買到。

比香港網上平:HK$4

第七位 固力果 – 百力滋 家庭裝

固力果-百力滋 9包裝 ¥230(大約HK$16) (圖片來源:lingsik.com)

百力滋喺香港及日本都係人氣零食,喺日本仲會搵到當地先有嘅口味,所以唔少人都鍾意買百力滋當手信送比親戚好友,喺香港買咁大包裝嘅百力滋通常都要HK$20,不過喺呢間零食店就平少少,而且份量咁多啱晒當手信送比其他人!

比香港網上平:HK$4

第六位 即飲濃厚粒粒忌廉栗米湯

190g 即飲濃厚粒粒忌廉栗米湯 ¥78(大約HK$5) (圖片來源:amazon.co.jp)

冬天咁凍飲返杯熱嘅粟米湯就最正!所以呢種即飲嘅罐裝粟米湯喺冬天特別受歡迎,不過喺香港起碼要HK$11先買到一罐,不過同樣價錢喺呢間零食店就可以買到兩罐喇!

比香港網上平:HK$6

第五位 Meiji明治雪吻朱古力

60g Meiji明治雪吻朱古力 ¥190(大約HK$13) (圖片來源:ymatou.com)

冬天除咗會令人想買熱飲之外,仲係朱古力爭相推出嘅時期,呢款冬季限定嘅明治雪吻朱古力喺香港一直都係受歡迎嘅零食,不過售價起碼都要HK$19以上,不過喺呢間零食店只要HK$13,小編見到都想買返盒!

比香港網上平:HK$6

第四位 固力果水果味Pocky

16.2g 固力果蜜桃味Pocky ¥148(大約HK$10) (圖片來源:cafezanmai.com)

受歡迎程度一直同百力滋旗鼓相當嘅一定係Pocky!呢間零食店除咗有超多口味嘅Pocky可以選擇之外,價錢仲要比香港買平,以蜜桃味Pocky為例,喺香港便利店買要HK$18,不過日本買就只係HK$10一盒!

比香港便利店平:HK$8

第三位 粟米棒

粟米棒(16枝) ¥156(大約HK$11) (圖片來源:[email protected]

呢款係日本嘅經典零食,已經推出咗好多年,相信係唔少人嘅童年回憶,喺香港買嘅話通常起碼都要HK$1.5一枝,不過呢間零食店16枝都只係HK$11,計返一枝都只係HK$0.7!平到咁一定要買多幾枝!

比香港網上平:HK$8(10枝)

第二位 龍角散喉糖

88g 龍角散 – 潤喉糖 ¥220(大約HK$15) (圖片來源:feebee.com.tw)

「龍角散」出晒名對舒緩喉嚨痛超級有效,唔少人都會趁去日本旅行掃多幾盒,所以龍角散嘅喉糖同樣受歡迎!呢款喉糖喺「二木の菓子」同樣有賣,每包只係HK$15,不過同樣大小嘅龍角散喉糖喺香港買就要HK$27先買到,有需要嘅朋友不妨過來掃多幾包!

比香港網上平:HK$12

第一位 麒麟 – 午後紅茶

1.5L 麒麟 – 午後紅茶 ¥189(大約HK$13) (圖片來源:findprice.com.tw)

一直大受歡迎嘅午後紅茶喺日本唔同地方都可以買到,呢間零食店1.5公升嘅午後紅茶都只係HK$13,不過同樣價錢喺香港就只係買到500ml,但喺日本已經可以買到2枝,鍾意飲嘅人記得買返枝喇!

比香港網上平:HK$14

特別推介:¥10糖

「二木の菓子」有好多造型非常可愛嘅糖,而且價格只係¥10,超抵買!(圖片來源:[email protected]

「二木の菓子」有個角落頭放咗好多唔同類型嘅糖,而且每粒糖嘅價錢只係HK$0.7,簡直係糖果天堂!鍾意食糖嘅人記得拎個籃去掃貨喇!

小編溫馨提示

1. 「二木の菓子」嘅第一營業所及ビック館都係可以處理免稅嘅店舖!只要購物滿¥5,000(大約HK$347)就可以退稅,而且店舖仲有免費紙箱提供,掃貨就最方便!
2. 不過零食店只可以用現金付款,如果想掃貨記得帶定多D現金先去喇!

郵寄方法

可以參考以下文章:
【極抵零食】大阪必去零食批發店! (附交通指南)

交通方法

由JR御徒町站向前步行1分鐘即可到達。

二木の菓子「第一營業所」
營業時間:10:00~20:00
地址:東京都台東区上野4-1-8

二木の菓子「ビック館」
營業時間:10:00~20:00
地址:東京都台東区上野4-6-1
官網:http://www.nikinokashi.co.jp/

 

【閱讀更多】
【東京大阪都有!】烏龍茶$3炭燒咖啡$2!日本隱世超平批發超市
【必睇必買必食】鄰近東京大阪北海道!5大日本天然溫泉及玩樂推介