【親子遊必去】小朋友都可以揸電單車?超受歡迎 北海道星野TOMAMU度假村

0
464

冬天就來到,亦係滑雪嘅好季節,以為唔識滑雪去到滑雪場就無野做?北海道星野TOMAMU度假村準備咗超多雪上活動,除咗可以跟教練學滑雪之外,仲有雪上電單車、香蕉船等,應有盡有,超啱滑雪初哥或者一家大細去北海道玩嘅旅客!星野TOMAMU度假村一向受歡迎,到咗冬季活動嘅時期(11月至3月)兩間酒店更加經常預約爆滿,除咗因為酒店外面嘅超靚雪景,亦因為度假村提供多元化嘅雪上活動,就算唔識滑雪嘅人、小朋友等都可以一齊同樂!

租賃區滑雪用品齊全

所有滑雪用品已經有齊曬超級方便!(圖片來源:pixnio.com)

滑雪場入口喺正酒店The Tower隔離,一放低行李就可以落樓下滑雪,非常方便!酒店The Tower及RISONARE都設有滑雪用品租賃區,租賃區設於酒店一樓,基本上所有滑雪用品已經齊曬,由滑雪板、滑雪用靴、滑雪服、滑雪鏡都可以租借,滑雪服亦有小朋友啱著嘅尺寸,租借用品需要另外付費,收費按小時或者日數計算,所有滑雪用品都可以網上預約,租賃區亦有手套及帽出售。

多元化滑雪課程

有教練嘅細心指導,就算係滑雪初哥都無有怕!(圖片來源:官網)

如果係滑雪初哥,度假村設有唔同嘅滑雪課程,有團體課程或者私人教學課程,小朋友都可以參加,課程費用¥5,000起(大約HK$353),課程更加可以喺網上預約,唔洗擔心到時去到搵唔到教練咁徬徨!

鐘意滑雪嘅人可以搭收費嘅纜車去滑雪場嘅其他部分,向高難度挑戰!

雪上活動報名中心GAO Outdoor Center

GAO Outdoor Center超近酒店The Tower,一放低行李就可以盡情玩雪上活動喇!(圖片來源:官網)

唔想滑雪,去到滑雪場又可以有咩做?想玩其他雪上活動嘅人可以去GAO Outdoor Center!GAO Outdoor Center嘅位置接近酒店The Tower停車場,旅客可以喺平板電腦選擇自己鐘意嘅活動,活動項目可以用中文顯示,而且中心亦有識得中文嘅職員,唔洗擔心溝通問題。中心由早上9點開放至下午4點,淨係雪上活動已經可以玩全日!

超人氣雪上電單車

有導覽員帶領住玩電單車,刺激又安全!(圖片來源:官網)

度假村提供嘅雪上活動好多,其中最受歡迎嘅一定係雪上電單車!坐住電單車就可以感受到喺雪地上飛馳嘅快感,啱曬鐘意刺激嘅人!雪上電單車有兩種形式,一種係由導覽員帶領,感覺相對安全,不過要16歲以上嘅人先可以獨自參加,3至15歲嘅兒童必須有一位大人陪同先可以參加,呢種形式唔需要事前預約,收費按距離計算,最平係3km收費¥2,600(大約HK$184)。

連小朋友都可以享受雪上飛馳嘅快感!(圖片來源:官網)

另一種係旅客獨自駕駛雪上電單車,有半日或者一日體驗可以揀,不過活動需要16歲以上人士先可以參加,而且需要事先預約,11月開始接受網上預約申請。不過度假村亦有提供專門比5歲至12歲兒童玩嘅雪上電單車,兒童電單車唔需要預約,收費係每10分鐘¥1,700(大約HK$120)。

一家人一齊坐雪橇,肯定好有聖誕氣氛!(圖片來源:官網)

除左雪上電單車,度假村亦提供香蕉船、橡皮艇、雪橇等刺激活動,呢三項活動都唔需要預約,而且大人同小朋友都可以一齊參與,啱曬一家大細來北海道玩嘅家庭!

另類之選 雪上靜態活動

大人同小朋友一齊雪中漫步,其實都幾浪漫!(圖片來源:官網)

如果鐘意靜態活動,可以選擇雪中漫步體驗!喺鋪滿雪嘅樹林散步,感覺特別,而且度假村會提供講日語或者英語嘅導遊,跟住導遊行就唔洗擔心喺樹林蕩失路!活動全長45分鐘,每人¥2,600(大約HK$184),3歲以上小朋友可以參加,不過活動需要預約,11月開始接受網上預約申請。

小朋友喺香港肯定無辦法體驗冰上釣魚嘅樂趣!(圖片來源:官網)

另外,旅客亦可以參加冰上釣魚體驗,全程有帳篷保護,唔洗擔心釣魚個陣受寒風吹襲,不過6歲以上小朋友先可以參加,亦需要事先預約,11月開始接受網上預約申請。

冬天必去 期間限定愛絲冰城

冬天先有嘅愛絲冰城,一定要放入行程!(圖片來源:官網)

除咗雪上活動,冬天去星野TOMAMU度假村就一定要去只有冬天先出現嘅愛絲冰城!如果係酒店住客可以免費參觀,每日開放時間由下午5點至晚上10點,成個冰城嘅建築物都模仿愛斯基摩人嘅房屋設計,用冰砌成唔同嘅設施,例如冰之教堂、冰之餐廳、冰之酒吧、冰之滑梯等,咁難得一見嘅景色,絕對唔可以錯過!

星野TOMAMU度假村酒店

(圖片來源:官網)

不過想玩以上冬季限定活動,當然入住旁邊嘅酒店就最方便!星野TOMAMU度假村設有兩間酒店分別係The Tower及RISONARE,The Tower嘅房間價格比較親民,冬季入住雙人房每晚HK$1340起(已包早餐),不過房間比較細,但出入滑雪場比較方便。RISONARE嘅房間價格就比較貴,冬季入住雙人房每晚HK$2540起(已包早餐),酒店距離滑雪場或餐廳都比較遠,不過房間就比較大,房內更設有按摩浴缸。

酒店預訂網址:https://l.flynow.hk/tomamf1d39

(圖片來源:官網)

雖然兩間酒店嘅價錢有分別,不過兩間酒店都非常受歡迎,想成功預約酒店嘅話,記得要起碼3個月前預訂!預訂時會附送早餐、木林之湯及微笑海攤嘅使用券、霧冰平台嘅纜車券。

平過住酒店!度假村隱秘低價住宿

(圖片來源:trip.com)

The Tower雖然已經平過RISONARE,不過價格都係比一般酒店貴,想再住得平D?其實都仲有其他選擇!係兩間酒店嘅中間位置其實有一間Alpha自助公寓,同樣由星野集團管理,不過房價比兩間酒店低,冬季入住雙人房每晚HK$1058起,雖然無冷氣,不過冬天會供應暖氣,而且公寓嘅C棟就喺森林餐廳隔離,附近亦有接駁巴士嘅車站,來往各個景點都非常方便!愛絲冰城、木林之湯、微笑海攤等設施即使非酒店住客都可以使用,只係需要收費,不過公寓會附送餐廳及使用設施嘅優惠券,價錢唔會太昂貴。

原本喺Airbnb就可以輕易預約,不過由於日本喺今年6月實施新嘅民宿管理法,收緊對民宿嘅營業管理,現時大部分預訂網站已經無法預約Tomamu The Village Alpha嘅房間,到底仲可以喺邊度預約?

其實仲可以喺Tomamu The Village Alpha嘅官網預訂房間,不過冬季房間供應緊張,想今年冬天去北海道星野TOMAMU度假村嘅人記得盡快預約喇!

Tomamu The Village Alpha預訂網址:https://l.flynow.hk/tomamef87e

 

【閱讀更多】
【自駕遊攻略】北海道5間租車公司大比拼!究竟邊間最抵玩?
【日本超正住宿】晚晩免費宵夜放題!大阪福岡性價比高酒店推介