【東京大阪都有!】烏龍茶$3炭燒咖啡$2!日本隱世超平批發超市

0
22037

去日本掃平貨可能只會諗到outlet、激安殿堂、玉出超市等,其實仲有間超市賣嘅貨品都超級平,而且喺東京、大阪、福岡、北海道、沖繩等市區都有分店,交通好方便!超市入面嘅貨品,例如零食、飲品等有D價錢平香港一半有多!買返來自己食或者當手信送比朋友都好,想掃平貨嘅你記得mark低喇!

記得認住呢個超大嘅綠色招牌!(圖片來源:wikipedia)

今次介紹嘅超市叫做業務超市(業務スーパー),喺全日本有過百間分店,貨品主要想吸引餐飲業界人士購買,為餐廳入貨,所以貨品售價好平,而且通常大包裝嘅貨品會更加平。超市亦歡迎一般遊客,如果你想用最抵價錢買最多嘅手信,就一定要認住呢度喇!小編為你精選咗10大超抵買貨品,仲整咗個最抵貨品排行榜,到底邊樣係最平?

業務超市10大抵買貨品排行榜

第十位 薯片

60g 薯片 ¥55(大約HK$4) (圖片來源:Curiosity [email protected]

超市內有好多日本國內出產嘅薯片一律只係賣¥55!喺香港超市,同一大小嘅薯片最平都要HK$7.8,日本薯片平好多!

比香港超市平:HK$3.8

第九位 樽裝烏龍茶

500ml 烏龍茶 ¥37(大約HK$3) (圖片來源:gymsuper.blog.fc2.com)

日本國內出產嘅烏龍茶,最平只係¥37!同樣大小嘅烏龍茶喺香港超市最平都要HK$6.9,喺日本已經買到兩支喇!

比香港超市平:HK$3.9

第八位 CALBEE杯裝薯條

CALBEE杯裝薯條 ¥88(大約HK$6) (圖片來源:calbee.co.jp)

呢款薯條係日本限定發售,所以喺其他地方都買唔到架!超市賣¥88,小編查過香港網站售賣同款薯條就要HK$10,日本限定發售嘅貨品當然日本買會平好多啦!如果你都鍾意呢款薯條記得大手入貨喇!

比香港網站平:HK$4

第七位 罐裝咖啡

190ML 咖啡 ¥25(大約HK$2) (圖片來源:nanahime.net)

呢款係日本國內出產嘅咖啡,一罐只係HK$2,好抵買!同樣大小嘅罐裝咖啡喺香港超市買起碼都要HK$6.9,反正咁細罐好快飲完,不妨買返罐試下。

比香港超市平:HK$4.9

第七位 意大利粉

500g 意大利粉 ¥97(大約HK$7) (圖片來源:[email protected]

一大包意粉都只係¥97!同樣大小嘅意粉喺香港超市最平都要HK$11.9,雖然意粉唔係日本嘅特色菜色,不過價錢咁吸引,小編睇到都想買返包!

比香港超市平:HK$4.9

第五位 料理包

料理包 ¥78(大約HK$5) (圖片來源:MaoMao [email protected]
Pokka 粟米濃湯 ¥78(大約HK$5) (圖片來源:shopdada.com)

呢種懶人料理包好方便,整熱就食得,啱晒平日返工好忙嘅人,而且價錢唔貴,可以買返包備用。Pokka 粟米濃湯喺香港超市都搵得到,不過就要HK$12先買到,難得來日本買可以平咁多,鍾意嘅話不妨買返包!

比香港超市平:HK$7

第五位 午後紅茶

500ml 午後紅茶(檸檬茶) ¥78(大約HK$5) (圖片來源:kirin.com.tw)

雖然午後紅茶香港都有得買,但日本嘅產品當然喺日本買會平好多!500ml嘅午後紅茶(檸檬茶),香港超市通常賣HK$12,但業務超市只要¥78,平成一半!

比香港超市平:HK$7

第三位 礦泉水

2L天然水 ¥49(大約HK$3) (圖片來源:amazon)

礦泉水嘅價錢真係平香港一半有多!同樣大小嘅礦泉水喺香港超市最平都要HK$13.9先有!但呢間超市只要HK$3,啱晒一班人去旅行嘅時候買!

比香港超市平:HK$10.9

第二位 茶包

烏龍茶茶包 5gx52p ¥148(大約HK$10) (圖片來源:seesaa.net)

呢種茶包買一大包先至¥148,但喺香港超市買同樣重量嘅茶包就起碼要HK$23.2,好抵買!不過有網友話呢種茶包嘅茶味比較淡,如果鍾意飲濃茶嘅人就唔建議買喇!

比香港超市平:HK$13.2

第一位 牛奶

1L鮮牛奶 ¥157(大約HK$11) (圖片來源:gyoumugets.com)

牛奶喺日本出晒名好飲,價錢亦唔算貴,市面上200ml嘅樽裝牛奶大概¥130至¥150,不過業務超市嘅牛奶就更加抵買,1公升只要HK$11!喺香港超市買最平嘅日本牛奶都要HK$26.9!日本牛奶又平又好飲,難得來旅行一定要飲返杯!

比香港超市平:HK$15.9

小編溫馨提示

1. 以上價格只供參考,一切以店舖價格為準
2. 部分店舖會設有¥78零食區,一包零食只係約HK$5,鍾意零食嘅人記得唔好錯過呀!
3. 超市定期設有每月特價貨品,掃貨嘅時候就更加抵買!
4. 部分店舖唔可以用信用卡付款,去之前記得帶備足夠嘅現金呀!

 

營業時間:9:00~22:00(各分店時間會有差異)

地址:
(東京)東京都新宿区百人町2-15-1【距離新大久保站2分鐘步程】
(大阪)大阪府大阪市中央区日本橋2丁目1-9【距離日本橋站7分鐘步程】
(北海道)北海道札幌市中央区南2条西2丁目おくむらビル1F【距離狸小路站3分鐘步程】
(福岡)福岡県福岡市東区筥松2-32-3【距離箱崎站1分鐘步程】
(沖繩)沖縄県那覇市具志875番地
*更多分店地址可到官網查詢

官網:https://www.gyomusuper.jp/index.php

 

【閱讀更多】
【必睇必買必食】鄰近東京大阪北海道!5大日本天然溫泉及玩樂推介
【極抵零食】大阪必去零食批發店! (附交通指南)