【新手指南】京都和服店全指南 流程收費玩法大公開

0
634

見到人地喺日本影咗套靚和服嘅相,自己都想去影番輯和服特輯,但又唔知點做,又驚搵間唔好嘅。小編就整理咗租賃和服嘅一般注意事項,包括時間安排同通常收費模式,新手上路都唔洗驚啦!

流程

一般租和服都係大概咁樣做。我地通常都建議預先預約定,因為walk-in 個陣有機會撞正有旅行團幾十人咁黎,到時就真係唔知要等幾耐啦。向店員示意自己係預約又或者係有walk-in

  1. 揀plan 同比錢
  2. 揀和服、腰帶等等
  3. 店員協助下着和服同寄存隨身行李同衣物
  4. 化妝set 頭
  5. 影相去玩 !
  6. 按時交還和服同拎番寄存嘅物品

【閱讀更多】
【揀和服必去】小朋友都啱著!7間京都人氣和服店推介
【自駕遊攻略】北海道5間租車公司大比拼!究竟邊間最抵玩?
【日本超正住宿】晚晩免費宵夜放題!大阪福岡性價比高酒店推介
【東京懶人包系列】[第2彈] 2018 五日玩盡東京山手線

 

收費模式

一般收費項目

通常都係一個個套餐咁計比你揀。去租和服,就梗係要比件和服你啦,一般都仲會包埋其他配件,好似係和服浴衣專用嘅底衫、腰帶、手拎小布包、木屐。而襪都要係專用嘅二指襪,係着人字拖同木屐用,有啲會係個套餐個價錢都包埋,有啲又會要你另外加錢, 但通常都係比你拎走,咁你都唔會想同其他人share 襪用。另外就係店家都會負責寄存你換出黎嘅衣物同隨身行李,剩係拎鎖匙同銀包。


(圖片取自wargo 官網)

因為和服太多部件太麻煩,和服店係會包埋有個專業嘅和服師同你着。留意,呢條片已經係8倍速 !

額外加錢項目

知道每個人都有唔同預算同期望,所以可以自己考慮加埋下列細項。價錢就最好問番鋪頭。

套餐upgrade

唔同價錢就當然係有唔同奢華程度嘅和服、頭飾可以揀,但一般都係愈貴愈靚愈多花巧刺繡花紋,一分錢一分貨嘛。而且比多少少可以有多啲唔同款揀,要睇你自己鐘意啦。都有時候會介紹你揀振袖,都係和服一種,原本係專比未婚少女所穿,比較青春可愛,通常顏色都鮮艷好多。不過人人喜好唔同,如果自己都鐘意基本套餐個啲款,就無必要加錢upgrade 啦。另外,好多和服租賃店都可以比客人去分size 揀,好似係兒童size、較豐滿嘅加寬size同較高佻嘅加長size,唔同人都應該可以搵到啱身嘅和服,不過就有可能要加多少少錢。有啲和服店係可以另外加錢買一份和式午餐,可以着住和服食,又可以順手影一堆靚相。


(圖片取自Wargo 官網)

化妝Set 頭

通常set 頭同化妝都係要另外加錢,但小編覺得都難得有件靚靚和服着,都係加多少少錢,又靚,又唔洗煩。 額外嘅小配飾同埋特定嘅着法就可以另外再加錢。有時你揀個套餐比較貴,所以會唔洗你另外比錢,所以都係要係比錢之前向店員了解清楚好啲。當然各位美妝達人都可以自己set 好頭化好妝先去着都冇問題。


(圖片取材自岡本)

做齊全套真係好靚 ! 放心,雖然一般都期望客人頭髲留到及肩先可以整到多啲唔同髲型,但係左上角嘅model 就係個短頭髲示範啦。

延遲交還

如果唔捨得都可以加多少少錢延遲到第二日先去還都得。但就要事先同店家個邊講番先。

拍攝服務

同行如果無一個一流攝影師,都可以向店家另外加錢,請一個專業嘅攝影師幫大家去拍一輯靚相,仲可以有滿滿日本傳統氣圍嘅京都做背景,Up 番上Facebook IG 都可以去等其他人葡萄下。


(圖片取自夢館官網)

有部分嘅和租賃店設有專業攝影棚,可以有一個淨色背景,有啲仲附設將相片制成明信片等嘅服務,不過價錢就唔平啦。

酒店交還服務

如果唔想突登行番去店家還,又或者想着到番酒店,好多店家都會好貼心比你番到酒店先除和服黎還,而你嘅隨身衣物都會送番去酒店。你只需要將和服交落酒店指定大堂就可以啦,店方會自己派人黎拎。但呢項服務好多都係只限於京都附近同和服租賃店有協議嘅酒店,但都一樣要一早同鋪頭講,等佢安排送你嘅隨身行李番酒店。


(圖片取自夢京都官網)
店家會要求客人將和服放入特備嘅袋,自己將成袋和服交到大堂就冇問題啦。

罰金

如果整污糟咗、整爛件和服就當然要賠啦,價錢就間間有所不同。女士們記得千祈唔好搽香水又或者用濃味嘅護膚品,鋪頭有機會因為和服沾染到味道而加額外罰金。不過如果係食物漬呢類有機會洗得到嘅就有可能唔洗賠。但唔見咗人地借嘅小布袋、飾物等等都會被收取罰金。當然最好就盡量唔好整污糟又或者整爛人地啲嘢啦,有乜爭嗌都唔好啦,旅行要開開心心嘛。

時間安排

早啲去,梗係有着數啦 ! 早啲去,啲款就唔怕比人揀哂,到時就花多眼亂,要預番啲時間慢慢揀呀 ! 一般嘅和服都有分成五六件嘢起,都真係要花啲時間着同除。所以一般時間上都係20分鐘揀、20分鐘着,20 分鐘set 頭,而還個陣都要留番少少時間除同落妝,要自己就番時間呀。

呢條片就簡介咗差唔多成個流程,總之就係有好多嘢可以揀,大家心大心細唔知揀乜好,所以就好似搞好耐咁。

季節性

而家係夏天,通常都可以揀番要傳統和服,或者係輕便涼爽嘅浴衣。浴衣一般價錢比較平,所以租賃收費亦都應該低啲,但係有啲和服租賃店係賣埋浴衣,即係件浴衣可以自己拎番屋企,所以價格較貴。比錢前,要向店員查詢清楚呀 ! 而冬天好多時都係比傳統和服,同埋一啲披肩同羽織(日式外套) 比女士禦寒用,但都有可能要額外收費,所以都可以試下着件圓領同簿身嘅保暖內衣打底。


(圖片取自夢館官網)

左邊張圖中model 所著嘅黃色外衣就係羽織﹔右邊張圖係毛披肩。都係唔夠暖可以自己外面加件淨色大頸巾,因為淨色比較百搭同容易襯番和服。

【閱讀更多】
【去居酒屋必備】 不可不知嘅5件事 連新手點菜指南
【懶人救星】2018最新!五日四夜 高雄台南文青美食行程
7大天神博多屋台攻略(內含屋台潛規則同屋台推介)
【懶人救星】2018最新!五日四夜 玩盡大阪全攻略