【親子遊攻略】免費玩足全日!5大放電必去北海道親子公園推介

0
86

北海道地大物博,亦可能因而擁有比較多自然環境,係親親大自然嘅好地方,想趁機比小朋友接觸大自然,又想有唔同類型嘅遊樂設施比佢哋放電?北海道絕對係最佳選擇!全北海道都有好多專為小朋友而設嘅公園,而且遊樂設施以自然為理念設計,例如大型攀爬網、山形彈床等,令小朋友可以嘗試與別不同嘅玩樂體驗,今次介紹嘅親子公園除咗有超多遊樂設施可以比小朋友玩足全日之外,更重要嘅係大部分公園都係免費入場!想帶小朋友「放電」嘅你記得mark低啦!

1. 冬季免費入場:瀧野鈴蘭丘陵公園
(滝野すずらん公園)

夏天玩水消暑就最正!(圖片來源:官網)

瀧野鈴蘭丘陵公園係收費嘅公園,分為4大區域,包括溪流區、中央區、瀧野之森區(東區)及瀧野之森區(西區),其中溪流區係免費區域,夏天最啱比小朋友喺戲水池玩水消暑。

 

View this post on Instagram

 

A post shared by soukentak (@soukentakmikan) on

如果想帶小朋友去放電就一定要去位於中央區嘅兒童之谷,入面有超多遊樂設施,包括位於室外嘅彈跳巨蛋(彈床)、崎嶇火山(充氣柱子)、蟻窩之塔(滑梯)、熔岩滑梯以及位於室內嘅彩虹之巢巨蛋。

9條完全唔同彎曲程度嘅熔岩滑梯!啱曬鍾意刺激嘅小朋友!(圖片來源:[email protected]

其中最受歡迎嘅一定係有9條完全唔同彎曲程度嘅熔岩滑梯!非常啱鍾意刺激活動嘅小朋友,不過滑梯只限3歲以上嘅小朋友玩,另外公園亦有規定12歲以下兒童玩滑梯時必須載頭盔,公園備有頭盔可以免費借用。

小朋友可以安全地喺網入面爬到高嘅地方,超好玩!(圖片來源:官網)

彩虹之巢巨蛋係大型室內攀爬網場,小朋友可以喺網裡面盡情爬跳,簡直係放電首選!

冬季入場免費!連雪圈都係免費!(圖片來源:官網)

另外公園會因應季節而開設部分期間限定嘅設施,夏天嘅時候會比小朋友喺草地玩球類活動,草地到咗冬天就會搖身一變,變成大型滑雪場,公園仲會提供雪橇、雪鞋、雪圈比旅客免費借用,至於租借滑雪板等用具就要收費,詳情可以睇收費表。

(圖片來源:官網)

入場費:15歲或以上人士每人450円(大約HK$32),15歲以下兒童免費入場
*冬季(由12月23日至3月31日)不論大人或小朋友都免費入場
開放時間:
秋天(由9月1日至11月10日):9:00~17:00
冬天(由12月23日至3月31日):9:00~16:00
地址:〒005-0862札幌市南區瀧野247門牌
網站:http://www.takinopark.com.t.bn.hp.transer.com/
交通:
自駕:由新千歲機場到瀧野鈴蘭丘陵公園大約50分鐘車程,公園設有停車場,泊車費為410円(大約HK$32)
鐵路或巴士可參考下圖:

(圖片來源:官網)

2. 最近札幌市中心:月寒公園

公園範圍超大,有小學生都可以玩高爾夫球嘅球場(圖片來源:官網)

月寒公園位於札幌市區,而且接近地下鐵站,突然之間想帶小朋友去公園玩都非常方便!月寒公園嘅範圍好大,設有網球場、高爾夫球場等設施,不過想帶小朋友去「放電」的話就要留意以下兩個地方!

綠色嘅長滑梯超啱鍾意刺激嘅小朋友,如果年紀比較細嘅小朋友可以玩隔離嘅黃色滑梯(圖片來源:koen-chikara.jp)

喺「月寒之丘」有兩座札幌市內最大型嘅長滑梯,綠色嘅滑梯比黃色嘅滑梯高,綠色滑梯高達40米,滑落來嘅時候速度感十足,非常受小朋友歡迎!

想知道滑梯嘅速度究竟有幾快,可以睇以下影片示範。

另一個必去之處就係喺長滑梯隔離嘅「森林遊樂場」,設有攀爬網等多種大型遊樂設施比小朋友玩,亦有設施比年紀較細嘅小朋友(3歲至6歲),玩曬咁多唔同設施絕對可以玩足半日!而且公園係免費入場,超級適合喺市區行完街想帶小朋友去公園玩一陣、趁機休息嘅家長!

遊樂設施都配有可愛嘅卡通圖案,小朋友玩個陣都特別開心!(圖片來源:koen-chikara.jp)

入場費:免費
開放時間:全日
地址:札幌市豊平区月寒西2~3条4丁目
交通:由地下鐵美園站步行10分鐘即可達月寒公園
網站:https://tsukisamu-park.jp/

3. 最啱自駕遊:神威之森公園(カムイの杜公園)

超多類型遊樂設施可以選擇,小朋友肯定玩得開心!(圖片來源:官網)

入場免費,連公園外嘅停車場都係完全免費!超級適合帶住小朋友自駕遊嘅旅客!神威之森公園位於旭川市,係深受當地人歡迎嘅大型公園,佔地13公頃,即係等於有18個足球場咁大,地方咁大比小朋友放電就啱曬!公園分為室內及室外遊戲區,室外有超級多大型遊樂設施比小朋友一邊玩一邊訓練體能,例如梯、橋或攀爬網,地下鋪設軟墊,家長就可以放心比小朋友喺設施中盡情爬上爬落!室外仲有一條滾輪長滑梯,斜度唔算高,連年紀比較細嘅幼兒都啱玩!

水池嘅水唔深,年紀細嘅小朋友都可以一齊玩水!(圖片來源:官網)

室內遊戲區前仲有戶外戲水池,夏天玩水就最消暑!

木造嘅波波池對小朋友肯定好有新鮮感!(圖片來源:[email protected]

室內遊戲區同樣範圍超級大,有大量木製遊戲設施比小朋友玩,當中有個香港比較少見嘅「木球」波波池,池裡面嘅球都係用木造,表面光滑,對小朋友來講肯定好有新鮮感!

 

View this post on Instagram

 

A post shared by SallyLin (@sallycafe15) on

室內遊戲區設有休息室,有售賣零食及飲品,家長可以坐喺休息區望住小朋友玩。

入場費:免費
開放時間:9:00~17:00
地址:〒070-8024 北海道旭川市神居町富沢
交通:公園位置比較遠離公共交通工具,自駕前往會比較方便
網站:http://www.asahikawa-park.or.jp/park/afforestation/kamui.html

4. 超靚自然風景:噴火灣風景公園
(噴火湾パノラマパーク)

呢度有超大片草地可以比小朋友玩!(圖片來源:官網)

噴火灣風景公園喺2006年設立,佔地62公頃,除咗係大型汽車露營地,仲設有室內及室外遊樂場、餐廳、北海道手信專賣店等,係大人同小朋友都可以玩得開心嘅好去處!公園就喺高速公路隔離,而且設有停車場,非常方便自駕遊嘅旅客!

噴火灣風景公園以自然美景聞名,家長可以帶住小朋友一齊喺一大片草地上野餐,望住靚景食野又唔洗怕有其他人騷擾,可以好好享受獨有嘅親子時光!

有熱食,亦有小朋友鍾意嘅甜品,食物嘅選擇都算多!(圖片來源:4travel.jp)

如果無帶野食都唔緊要,公園內有間cafe提供熱食,有湯麵、烏冬、咖哩飯等,另外亦可以試下Cafe最出名嘅甜品——白之戀人雪糕,公園亦設有自動售賣機賣杯麵、飲品及零食。

有攀石等超多設施可以比小朋友玩!(圖片來源:官網)

食飽就有力氣盡情玩喇!室內遊戲區設有多款遊樂設施,例如波波池、攀石牆等,地下有鋪設軟墊,家長可以更放心比小朋友周圍玩,除咗一般嘅遊樂設施,室內區仲設有乒乓球枱,大人可以同小朋友一齊做運動,增進親子關係!

超大嘅山形彈床係最受小朋友歡迎!(圖片來源:官網)

室外遊樂場有超多大型遊樂設施,包括彈床、長滑梯、鞦韆,其中最受歡迎一定係範圍超級大嘅山形彈床,就算有幾個小朋友一齊玩都唔怕會撞到,而且因為彈床比較大,小朋友玩嘅時候需要由家長陪同,大人小朋友一齊蹦蹦跳跳,仲有助促進親子關係!

單車嘅外型好特別,小朋友一定鍾意!(圖片來源:官網)

公園設有唔同類型嘅單車,有部分單車嘅外型可愛,超級啱小朋友玩!

 

View this post on Instagram

 

A post shared by なわまき (@nawamaki) on

另外公園設有花田及果園,如果撞啱季節去,可以見到一大片太陽花、秋英花等,啱曬一家人影相呃like!果園由7月下旬至9月都有唔同類型嘅水果可以摘,例如提子、野櫻梅、藍梅等,小朋友可以試下親手摘水果,亦可以食到當造、最新鮮嘅水果,有得玩又有得食,絕對係親子遊嘅好地方!

入場費:免費
開放時間:10:00~18:00
室外遊樂場開園期間:4月下旬~11月上旬
室內遊樂場及Cafe開園期間:全年開放
地址:北海道二海郡八雲町浜松368-8
交通:公園位置比較遠離公共交通工具,自駕前往會比較方便
網站:http://panorama.town.yakumo.hokkaido.jp/

5. 超多罕見遊樂設施:道立夢之森公園
(道立ゆめの森公園)

旅客中心嘅外型好突出,肯定好容易吸引到小朋友嘅注意!(圖片來源:官網)

道立夢之森公園係中標津町比較大型嘅公園,位置喺中標津機場旁邊,交通都算方便。公園面積大,設有高爾夫球場等大型設施,所以比小朋友玩嘅遊樂場都分成設室外及室內遊戲區,兩個區域都有超級多遊樂設施,而且全部都係免費任玩,最啱帶小朋友來放電!

小朋友可以喺咁大片草地上玩,親親大自然!(圖片來源:官網)

室外遊戲區有好多唔同類型嘅設施,有比較常見嘅鞦韆、彈床等,呢類型嘅設施下都有鋪設軟墊,家長唔洗擔心小朋友玩得太興奮而受傷。

道立夢之森公園亦有喺其他公園比較少見嘅特別設施,例如好有森林歷險感覺嘅木橋!公園喺水池上設置三種形式嘅木橋,有就咁行嘅木浮橋;亦可以企喺木浮板,用鐵枝「撐船過河」;或者企係木板拉繩過河,後兩種都需要體力,正好訓練小朋友嘅體能!

訓練體能嘅設施仲有人力軌道車!軌道車有兩種類型,分別係用腳踏推動或者用手拉桿推動,兩種都適合比小朋友釋放精力!而且呢類型嘅遊樂設施喺香港比較少見,小朋友玩得更開心!

範圍大,而且水唔深,就算係年紀比較細嘅小朋友都可以玩嘅戲水池!(圖片來源:官網)

公園亦設有一向超級受小朋友歡迎嘅滾輪式長滑梯及戲水池,絕對係夏天消暑嘅首選!

遊客中心嘅外型特別,係好受當地人歡迎嘅呃like景點!(圖片來源:[email protected]

相比起室外區,室內遊戲區嘅設施可能無咁多元化,不過同樣係比小朋友放電嘅好選擇!室內遊戲區位於遊客中心,中心外型有D似香港太空館,淨係外型已經可以輕易吸引小朋友注意!

遊戲區入面最受小朋友歡迎嘅遊樂設施一定係3個超大型嘅滑梯!(圖片來源:[email protected]

遊戲區範圍全部都鋪有軟墊,所有人都需要除鞋先可以進入遊戲區,區內有唔少遊玩設備提供,例如球類、兒童單車、彈床、滑梯、攀石牆等,加埋室外設施,肯定夠小朋友玩足全日!

遊客中心開放時間:09:00~17:00

入場費:免費
開放時間:
夏季(5月至11月):06:00~19:00
冬季(12月至4月):08:00~18:00
地址:〒086-1145北海道標津郡中標津町北中2番地5
交通:由中標津機場步行至道立夢之森公園大約20分鐘,自駕則大約3分鐘車程
網站:http://www.yumemori.jp/

 

【閱讀更多】
【訂房最後機會】最啱一家大細過聖誕!4大北海道滑雪度假村推介
【親子遊必去】小朋友都可以揸電單車?超受歡迎 北海道星野TOMAMU度假村
【自駕遊攻略】北海道5間租車公司大比拼!究竟邊間最抵玩?