【滑雪溫泉一日遊】車程只要1個鐘!3大必去大阪滑雪場

0
7198

去日本滑雪通常都只會諗到北海道,但其實大阪附近都有唔少滑雪場,而且距離市中心唔係太遠,車程大部分1個鐘內就到,非常方便!小編仲會話埋比你知邊個滑雪場有遊客優惠,更會推薦滑雪場附近超正嘅溫泉旅館,啱晒忙到無時間plan行程嘅你,如果你都想去滑雪,順便浸個溫泉嘅話,記得bookmark喇!

1. 六甲山雪上樂園(神戶:鄰近大阪)

六甲山雪上樂園超近大阪,如果去大阪旅行就啱晒!(圖片來源:[email protected]

六甲山雪上樂園係關西咁多個滑雪場之中最近大阪嘅一個,距離大阪只係50分鐘車程!由於係人工滑雪場,所以亦係關西地區最早開放嘅大型滑雪場,如果咁啱11月去大阪旅行嘅話,不妨過來初嚐滑雪滋味!

有教練在場,就算唔識滑雪都無問題!(圖片來源:官網)

人工滑雪場除咗雪量穩定,滑道嘅傾斜度亦比較平緩,係滑雪新手嘅最佳練習場地。就算完全唔識滑雪,樂園亦設有滑雪課程,由教練教授滑雪技巧,0滑雪經驗都完全無問題!

樂園有齊滑雪工具可以租借,咩都無帶咁去樂園都無問題!(圖片來源:官網)

呢度亦設有比小朋友玩雪嘅區域「戲雪樂園」,樂園備有雪橇租借,啱晒帶住小朋友去玩雪上活動嘅旅客。如果無帶滑雪裝備嘅話都唔緊要,樂園提供滑雪工具租賃服務,甚至連厚重嘅雪地衣物都可以租借,衣物有大人亦有小朋友嘅大小,非常方便!

小編溫馨提示

星期六日嘅人流比較多,如果人數太多嘅話,園方有可能會限制入場人數,如果唔想白行一趟咁掃興嘅話,小編建議你地早上早少少入場會比較好。

開放日期:2018年11月17日~2019年3月31日
營業時間:9:00~17:00(平日)、9:00~22:00(週末及假日)
入場費:大人(中學生或以上) 2,100円(大約HK$144)、小朋友(3歲至小學生) 1,050円(大約HK$72)
地址:神戸市灘区六甲山町北六甲4512-98
官網:https://www.rokkosan.com/zh-tw/ski/

交通篇

外國遊客交通優惠

只要出示有效護照就可以用呢個優惠喇!(圖片來源:官網)

到達JR或阪急六甲道站之後,需要轉一程巴士,再轉纜車及山上巴士先會到達六甲山雪上樂園,要搭咁多種交通工具,車費肯定唔少,不過園方就推出咗外國遊客專享優惠套票,只要出示有效護照就可以用優惠價¥1000買到三種交通工具嘅來回套票,計返港幣都只係大約HK$69!現場買來回車票就要¥2080(大約HK$143),好明顯買優惠套票會平好多!

而且套票仲附送園內餐廳9折優惠、購物優惠等,如果想去六甲山雪上樂園,記得買定套票先!優惠套票可以喺關西國際機場買到。

住宿篇

六甲山雪上樂園同有馬溫泉非常接近,如果滑完雪想喺神戶住一晚,不妨考慮有馬溫泉附近嘅溫泉旅館!

有馬溫泉兵衛向陽閣 (Arima Spa Hyoe Koyokaku)

呢個露天風呂喺客房入面,玩咗成日來浸一浸,加埋咁靚嘅自然風景,肯定好治癒!(圖片來源:官網)

呢間係有700年歷史嘅傳統日式溫泉旅館,距離有馬溫泉站只係5分鐘步程,訂房間嘅時候可以揀附有早餐及晚餐嘅方案,可以食到超正嘅懷石料理或神戶牛,呢間酒店仲可以預訂私人露天溫泉,一個人霸晒成個溫泉肯定好享受!

地址:日本神戶市北區有馬町1904
價格:雙人房HK$2070起
訂房網址:https://l.flynow.hk/f3c3b

2. 琵琶湖Valley滑雪場(大津:鄰近京都)


琵琶湖Valley滑雪場係關西地區最大規模嘅滑雪場,距離京都只係40分鐘車程,雖然係天然滑雪場,不過亦設有人工降雪機,確保滑道積雪量穩定。滑雪場以中級滑道為主,亦設有初阪及高級滑道,可以滿足到唔同人嘅需要,如果唔識滑雪亦都有滑雪課程可以報名。

免費雪具租借

大人可以同小朋友一齊玩,盡情享受親子樂!(圖片來源:官網)

呢個滑雪場設有兒童樂園,不過呢個區最正嘅係所有雪具都係免費提供!有雪橇、雪盤、鏟雪用具等可以免費租借,而且數量好多,唔洗擔心比較多小朋友同場就會無得玩。

如果唔想帶咁厚重嘅衣物,滑雪場亦有滑雪服可以租借,不過租借衣物需要收費。

小編溫馨提示

呢個滑雪場可以望到超靚嘅琵琶湖景色!不過因為位置地勢比較高,有可能會因為強風而關閉滑雪場,最好出發前上官網查下最新情況。

開放日期:2018年12月22日~2019年3月24日
營業時間:8:30~17:00、8:00〜17:00(週末及假日)
兒童樂園入場費:大人 800円(大約HK$55)、小朋友(3歲至小學生) 500円(大約HK$34)
地址:滋賀県大津市木戸1547-1
官網:http://www.biwako-valley.com/winter/

交通篇

自駕遊可以睇以下影片(滑雪場設有收費停車場)

公共交通工具

由京都出發嘅話,可以搭JR湖西線到「志賀」,再轉巴士到琵琶湖Valley。如果要去滑雪場就要再搭纜車。

坐住纜車可以高空望到琵琶湖靚景!(圖片來源:官網)

纜車來回票價:大人 2500円(大約HK$171)、小學生 1000円(大約HK$69)、幼兒(3歲以上未就學兒童) 600円(大約HK$41)

住宿篇

琵琶湖綠水亭 (Biwako Ryokusuitei)

玩完雪再浸個溫泉肯定好舒服!(圖片來源:agoda)

呢間溫泉酒店距離琵琶湖Valley滑雪場20分鐘車程,酒店提供免費接駁車,接送旅客由車站到酒店,房間空間大,房內設有私人溫泉,住客可以隨時浸溫泉,而且房內仲可以見到琵琶湖靚景,酒店附近亦有拉麵店及便利店,想食宵夜都好方便!

地址:滋賀県大津市雄琴6-1-6
價格:雙人房HK$1179起
訂房網址:https://l.flynow.hk/522d1

 

3. 滋賀箱館山滑雪場(高島:鄰近京都)

鋪滿白雪嘅滑雪場,配埋湖景真係超靚!(圖片來源:官網)

呢個滑雪場喺琵琶湖嘅另一邊,同樣可以見到琵琶湖嘅靚景!呢度距離京都48分鐘車程,距離大阪都只係77分鐘車程,以初級雪道為主,啱晒初學者練習滑雪!呢個係天然滑雪場,雪嘅質地好,仲要係最出名嘅粉雪,所以呢度一直好受歡迎,不過部分滑道設有人工造雪機,就算降雪量比較少都唔洗擔心無得滑雪。

大人小朋友一齊玩雪盤超開心!(圖片來源:官網)

呢度同樣有兒童戲雪區,可以一家大小一齊玩雪!場內可以租借滑雪工具,由滑雪板、雪盤,甚至係帽都可以租借,部分價格會分開大人及兒童價。唔識滑雪嘅話亦都可以現場報名參加滑雪課程。

開放日期:2018年12月14日~2019年3月
營業時間:8:30〜17:00(平日)、8:00〜17:00(星期六)、7:00〜17:00(星期日及假日)
地址:滋賀県高島市今津町日置前4201−4
官網:http://hakodateyama.sxl.cn/

交通篇

京都站出發:JR湖西線到近江今津站下車換乘巴士。
新大阪站出發:東海道本線到京都站,換乘JR湖西線到近江今律站下車換乘巴士。

到達箱館山巴士站之後,再搭纜車就會去到滑雪場!(圖片來源:官網)

到達箱館山巴士站之後需要再搭纜車先可以去到滑雪場。

纜車票價(請看下表)

懶人之選

喺滑雪場著聖誕老人衫肯定好有聖誕氣氛!(圖片來源:klook)

滋賀箱館山滑雪場附近比較少溫泉旅館,如果想滑完雪就返大阪,但又唔想煩交通嘅話,其實都可以參加一日團,可以選擇已經包埋滑雪工具嘅方案,咩都已經安排好,去到就可以滑雪,最啱忙到無時間plan行程嘅人!

預訂網址:https://l.flynow.hk/klookbd596

 

【閱讀更多】
【極抵零食】大阪必去零食批發店! (附交通指南)
【期間限定】睇紅葉必去!大阪京都8大超正賞紅葉熱點