【期間限定】睇紅葉必去!大阪京都8大超正賞紅葉熱點

0
501

秋天又係睇紅葉嘅最佳時間,日本嘅紅葉就出名又多又靚,但去邊到睇先可以影到最靚嘅風景相?小編今次就想介紹8個關西地區嘅賞紅葉景點,有D景點仲要唔係熱門嘅旅遊點,可以睇到靚紅葉之餘,又唔洗同人迫,未諗到去邊到睇紅葉嘅你不妨參考下!

大阪篇

1. 明治之森箕面國定公園

紅葉有瀑布襯托真係超靚,打卡一流!(圖片來源:walkerplus.com)

因為唔係主要嘅熱門旅客景點,遊人都比較少。公園入面有一大片自然森林,仲有一定要去嘅箕面瀑布從33米高嘅石駐壁流下,隔離就有幾棵楓樹襯托,係個好好嘅影相打卡位。公園都有一條散步徑,全長2.8公里,可以比大家圍住全公園行幾個圈。而公園喺11月紅葉期都會搞紅楓節,大家可以坐埋一齊食茶點同欣賞秋葉。公園入面都有店鋪有楓葉天婦羅,大家可以買番份做手信呀!

最佳賞紅葉時間:11月中旬~12月上旬
紅葉祭時間:2018年11月1日~30日
開放時間﹕全日開放
入場費﹕全免
地址:大阪府箕面市箕面公園
官網﹕http://www.mino-park.jp/

2. 勝尾寺

紅葉同紅色外牆嘅勝尾寺好襯!(圖片來源:官網)

從古都係達官人祁求勝利嘅地方,入面放有海量達摩,即係日本個款紅色粗眉傳統不倒翁,參拜嘅人都會係達摩底下寫上願望。到咗秋天,就會漫山紅葉,如果想要好啲嘅風景,都可以行上本堂個位,喺較高處就可以見到成個景區同湖互相輝影。喺夜晚仲有特別活動「幻想的世界」,到時寺會延長開放,以燈光同假霧營造出夢幻氣氛,一定要留低睇,日夜嘅景緻真係完全唔同 !

最佳賞紅葉時間:11月中旬~12月上旬
紅葉祭時間:11月中旬~12月上旬
開放時間﹕8:00-17:00
入場費:大人400円(大約HK$27)、小童300円(大約HK$21)
地址:大阪府箕面市勝尾寺
官網﹕http://www.katsuo-ji-temple.or.jp/index.html

3. 星田園地

喺吊橋上面賞紅葉夠曬特別!(圖片來源:官網)

係個郊遊好去處,入面有星之吊橋,係全日本最大嘅吊橋「星之鞦韆」,全長280米。大家可以徒步行,可以喺50米高空望哂成座都係紅葉嘅山。不過交通冇咁方便,冇得搭車上去,要自己行上去咖, 單程大概45分鐘,所以全程都係行山, 入面都係無餐飲設施同埋有部分係泥路黎,大家要盡力而為同做足準備呀,小朋友太細個同行動不便者就唔建議去啦。如果有時間同體力許可, 可以行下成個星田園地,有其他觀望台等嘅設施。

最佳賞紅葉時間:11月中旬~12月上旬
開放時間﹕09:30 – 16:30(星期二休息,4-5月同10-11月除外)
入場費﹕免費
地址:Hoshida, Katano, Osaka Prefecture 576-0016, Japan
官網﹕http://osaka-midori.jp/mori/hoshida/

 

京都篇

4. 嵐山

嵐山有好多寺院,寺院隔離通常都有得睇紅葉,咁多地方可以慢慢影!(圖片來源:網絡)

嵐山同樣以自然景觀為主,春櫻秋葉, 夏樹冬雪,一年四季去到都唔會失望而回﹔而附近亦有手信店同美食,仲有女士最愛嘅和服租賃店,女士們就可以靚靚去唔同景點留下倩影。而嵐山嘅賞紅葉好地方,一定要數天龍寺、常寂光寺、大覺寺。

去嵐山一定要坐小火車!(圖片來源:klook)

另外,都可以搭峨野嵐山小火車,小火車係好懷舊式嘅火車,大家可以坐定定嚮度, 就欣賞到大好山林同大河保津川,不過小火車都比較受歡迎,建議預早Book 定!仲有兩小時船程保津川遊船,見到壯麗牛松山同愛宕山嘅紅葉英景, 同奇石,非常值得坐一次。嵐山弣近仲有渡月橋、竹林之道、京友禪の光林等等景點,同有好多活動可以揀, 好值得大家花一兩日係呢度玩下望下遊歷下。

最佳賞紅葉時間:11月下旬~12月上旬
紅葉祭時間:2018年11月11日(日)
小火車開放時間﹕
09:00-19:00 ( 星期三休假,公眾假期除外)
小火車入場費﹕學生¥300(大約HK$21),成人¥500(大約HK$34)
預訂網址:l.flynow.hk/jrklo5a9e0
地址:京都府京都市右京区嵐山

5. 清水寺

雖然清水寺仍然維修緊,不過想睇京都全景嘅話仍然值得一去!(圖片來源:官網)

日本國寶,現為世界文化遺產,係京都地標同超人氣觀光景點,附近仲有大量手信店、小食店同和服租賃店,遊客必去!雖然而家清水寺嘅本堂直到2020年都仲維修緊,但係其他部分嘅清水寺都係照常開放同活動如常進行。好彩就係清水寺參觀必到嘅清水舞台都仲係可以入到,大家一定要去睇下京都全景,同埋秋天紅葉時間都可以見到寺下嘅大片紅葉。

最佳賞紅葉時間:11月下旬~12月上旬
開放時間﹕06:00-18:00
入場費﹕免費
地址:京都府京都市東山区清水1丁目294
官網﹕https://www.kiyomizudera.or.jp/en/

6. 北野天滿宮

密集嘅紅葉睇落更加靚!(圖片來源:walkerplus.com)

係日本供奉學問之神菅原道真公嘅寺廟,學生一定要順路去啦。而廟內有大量樹木,冬天可以賞梅,而秋天就當然係賞紅楓葉,有啲仲要係過百歲樹齡嘅老樹黎咖 ! 而係每年嘅紅葉季,都會有紅葉苑亮燈,入面有條路係沿途放眼都係紅葉,格外心曠神怡,不過就要收費,大人收¥750(大約HK$51),兒童半價,有份茶點,而天滿宮會延長開放到8點。另外,對廟會有與趣嘅朋友要留意番,天滿宮每個月25號都會有廟會,要睇啱日子去呀 。

最佳賞紅葉時間:11月下旬~12月上旬
紅葉祭時間:2018年10月25日~12月2日
開放時間﹕(4-9月) 05:00 – 18:00 / (10-3月) 5:30 – 17:30
入場費﹕免費入場(部分殿堂部分會另外收費)
地址:京都府京都市上京区馬喰町
官網﹕http://kitanotenmangu.or.jp/index.php

 

奈良篇

7. 奈良公園

去奈良公園就可以同過千隻鹿一齊賞紅葉喇!(圖片來源:walkerplus.com)

奈良公園除咗睇鹿同餵鹿,入面仲有好幾間寺廟同博物館,而且環山而建,景色優美,係港人熱門遊日點,而秋天更加係一個睇紅葉聖地。公園可以見到一大片天然山林,平地種有過萬棵樹,屆時除咗有紅色楓葉,仲有黃色嘅銀杏,同綠色嘅常青植物交融埋一齊會非常壯觀。公園有啲位都好適合去睇紅葉,好似係若草山展望台、春日大社周邊、浮見堂周邊同東大寺。不過唔同地方都可以發掘到唔同嘅紅葉美,而且要記得奈良公園最特別係入面過千隻鹿,大家可以見到鹿係紅葉樹下同踩係紅葉下嘅美態。

最佳賞紅葉時間:11月上旬~12月上旬
開放時間﹕24 小時,但公園內設另有獨立開放時間
入場費﹕免費入場,但公園內設施和鹿另外收費
地址:奈良県奈良市春日野町、雑司町、高畑町、登大路町
官網:http://nara-park.com/

8. 談山神社

喺郊外靜靜地賞紅葉都係幾好嘅體驗!(圖片來源:walkerplus.com)

位置比較遠離主要城市,神社附近都係山,所以環境格外清幽。神社又被稱社關西日光,傳聞當年日光嘅東照宮都有參考過談山神社,而神社嘅最大特色就係有庭全木造嘅十三層塔,有一排排紅葉係背後,大家記得要去呀!神社範圍內有超過3000千棵楓樹,如果去啱時間,所有楓樹轉紅嘅場景都係好壯觀。

最佳賞紅葉時間:11月中旬~12月上旬
紅葉祭時間:2018年10月14日(日)~12月9日(日)
開放時間﹕8:30 – 16:30
入埸費﹕大人¥600(大約HK$41)、小學生半價,小學生以下免費
地址:奈良県桜井市多武峰319
官網﹕http://www.tanzan.or.jp/

懶人之選:奈良一日遊

工作人員仲會話埋比你知邊個位影紅葉最靚,超級細心!(圖片來源:Klook)

如果想一次過去晒幾個熱門地方睇紅葉,又唔想煩交通或等車時間,亦都可以報一日團,超級方便!
預訂網址:l.flynow.hk/klookd7529

 

【閱讀更多】
【任摸任抱】超萌水獺陪你食午餐!6間必去 京都大阪動物cafe
【揀和服必去】小朋友都啱著!7間京都人氣和服店推介