【影相呃like首選】日本版天空之鏡!大阪京都5大超靚秘景推介

0
2693

以為大阪只有大型商場?以為京都只有寺廟?其實關西都有唔少超靚嘅自然風景等你去發掘!而且部分景點更加係連日本人都未必知道,人流無咁多,影靚相就最啱!如果你都想親親大自然,喺超靚景色之下影一輯「仙氣逼人」嘅相,就要bookmark以下地點喇!

1. 久米田池(大阪)

藍天白雲、夕陽,加埋個倒影,風景真係好靚!(圖片來源:ambitect.com)

久米田池係大阪面積最大嘅池塘,全年都儲滿水,所以好容易影到海天一色嘅景色,尤其是黃昏嘅景色,海及天都變成金黃色,睇落相當治癒!池塘仲不時有白琵鷺飛過來覓食,影相一流,所以有唔少日本嘅攝影發燒友都鍾意來呢度影靚相!

喺池塘隔離賞櫻花都係唔錯嘅選擇!(圖片來源:官網)

久米田池旁邊種滿櫻花樹,如果咁啱喺櫻花季節過來,配埋池塘嘅水景,影出來嘅景色肯定更加靚,係賞櫻花嘅最佳地點!

交通

距離JR阪和線「久米田站」15分鐘步程

地址:大阪府岸和田市池尻町~岡山町
官網: http://www.city.kishiwada.osaka.jp/soshiki/36/kumedaike.html

2. 上津屋橋(京都)

上津屋橋睇落超級長,名副其實日本最長嘅木橋!(圖片來源:tabicoffret.com)

位於京都嘅上津屋橋係全日本最長嘅木橋,全長356.5米,橋高5米,由於橋嘅兩邊都無圍欄,有畏高症嘅人過橋嘅時候就要特別小心喇!

天橋嘅兩邊並無扶手,有畏高症嘅小編見到都怕!(圖片來源:ochanokyoto.jp)

因為呢條橋嘅外型好有特色,所以唔少歷史電影都會來呢度取景,不過呢條橋喺2017年10月嘅時候曾經因為颱風而破損,但今年6月已經修復好並重新開放,如果你都想知道條橋要行幾耐先可以過到對面,就要過來睇下喇!

交通

乘搭京阪電車在「八幡市」站轉乘京阪巴士在「上津屋橋」站下車,步行5分鐘即可到達。

地址:京都府八幡市上津屋

3. 龍王之淵(奈良)

龍王之淵真係平靜如鏡!倒映好清晰!(圖片來源:hariinfo.jp)

龍王之淵位於名為「額井岳」嘅山上,高530米嘅地方,係自然形成嘅池塘。無風嘅時候,池塘周圍嘅景色可以好清楚咁倒映喺池中,形成一個好靚嘅鏡面,呢塊咁特別嘅「水鏡」每年都吸引唔少攝影發燒友過去影靚相,係攝影界嘅人氣景點!

龍王之淵除咗日頭見到嘅「水鏡」,夜晚嘅星空都好靚!(圖片來源:hariinfo.jp)

以為喺山上設施一定無咁方便?其實龍王之淵亦係行山嘅好地方,池塘嘅周邊已經設置行人天橋等設施,想過來散步都好方便!

堀越神社位於大阪天王寺,最出名係「一生一願大明神」,如果有好多願望嘅人,許願之前記得諗清楚先喇!(圖片來源:cultural-experience.blogspot.com)

附近仲有以「實現一生一次願望」而聞名嘅堀越神社,去完龍王之淵都可以順便過去行下!

交通

距離名阪國道針IC 15分鐘車程

地址:奈良県宇陀市室生向渕

4. 余吳湖(滋賀)

余吳湖靚嘅程度絕對唔會輸比烏尤尼鹽沼!(圖片來源:官網)

冬天嘅時候唔少人都會去琵琶湖附近嘅滑雪場玩,其實琵琶湖旁邊都有個面積比較細,但風景超靚嘅余吳湖!當無風嘅時候,湖面可以清晰倒映出山及天空,海天一色,所以亦被稱為「鏡湖」,到咗冬季,余吳湖更會化身變成銀白色嘅世界,有傳媒大讚景色靚到好似烏尤尼鹽沼咁!

如果未抽到時間去咁遠嘅地方,不妨過來睇下日本版嘅天空之鏡!

交通

距離JR余吳站5分鐘步程

地址:滋賀県長浜市余呉町川並2380-1
官網:http://kitabiwako.jp/

5. 貴船神社(京都)

「緣」除咗係姻緣,亦都代表人緣,如果想人緣好D都可以過來!(圖片來源:官網)

位於京都嘅貴船神社一直都係人氣景點,已經有1600年歷史,以「結緣」聞名,所以每年都有唔少人過來求姻緣,希望藉此提升戀愛運!

紅色嘅燈加白色嘅雪,成個畫面感覺好浪漫!(圖片來源:官網)

除咗求姻緣,其實神社嘅風景都出晒名好靚,尤其是冬天夜晚!落完雪之後,樓梯兩旁嘅燈籠全部點著,燈光加上雪景令成個畫面睇落非常浪漫!如果去京都,一定要過來參觀下!

交通

可以參閱下表

(圖片來源:官網)

地址:京都府京都市左京区鞍馬貴船町180
官網:http://kifunejinja.jp/index.html

 

【閱讀更多】
【滑雪溫泉一日遊】車程只要1個鐘!3大必去大阪滑雪場
【極抵零食】大阪必去零食批發店! (附交通指南)