【美食攻略】連日本人都大推!5間超正北海道湯咖哩餐廳推介

0
753

無食過湯咖哩唔好話你來過北海道!湯咖哩係北海道嘅特色菜色,同普通嘅日本甜咖哩唔同,湯咖哩嘅質地比較稀,所以通常同白飯分開上,而且可以選擇辣度,一般食法係將飯浸入咖哩食,至於咖哩嘅味道及配料就每間餐廳都唔同。小編今次搵咗5間出晒名好食嘅湯咖哩餐廳,有2間仲要入圍「2018年美食百名店」,即係日本人票選頭一百名最好食嘅咖哩餐廳。發源地札幌有超級多湯咖哩餐廳,唔想中伏嘅話記得睇定喇!

1. Suage+【超正雞串燒】

紅色外牆好易認!(圖片來源:tabelog.com)

呢間餐廳喺札幌有3間分店,google評論及食評網站TABLEOG分數都好好。餐廳嘅湯咖哩同多種蔬菜一齊煮,令咖哩味道香之餘又唔會太濃味,餐廳最受歡迎嘅菜色一定係知床雞串燒配蔬菜咖哩!知床雞肉質柔嫩多汁,雞皮經過炭火煎香,香氣四溢,來到一定要試下!

知床雞串燒配蔬菜咖哩 1,150円(大約HK$80) (圖片來源:官網)

營業時間:11:30~22:30(此為本店時間,分店時間各有不同)
地址:
札幌市中央区南4条西5丁目都志松ビル2F(本店)
北海道札幌市南4条西5丁目8-8 アイビル2 4階(2號店)
札幌市中央区円山西町7丁目1-1(3號店)
官網:http://www.suage.info/

2. Soup Curry Garaku【盒裝湯咖哩超方便】

呢間湯咖哩專門店喺北海道及東京都有分店,餐廳超級受歡迎,店舖外面經常大排長龍,如果唔想等咁耐,小編建議最好避開正餐時段。Garaku嘅湯咖哩同樣放入多種蔬菜一齊煮,所以配料非常入味,肉類方面有雞肉、豬肉、牛肉可以選擇,餐廳仲會設有期間限定菜色,每月轉一次,夠晒新鮮感!

10月限定菜色:椰菜卷煙肉配南瓜湯咖哩 1,250円(大約HK$87) (圖片來源:官網)

如果「食過返尋味」,想返到香港都可以食到咁好味嘅湯咖哩,餐廳亦有售賣盒裝嘅湯咖哩,買D留比自己食或者當手信送比朋友都好!

如果鍾意呢間餐廳嘅湯咖哩,記得買幾盒返香港慢慢嘆!(圖片來源:ezo [email protected]

營業時間:11:30~15:30(午餐)、17:00~23:30(晚餐)
地址:
札幌市中央区南2条西2丁目6-1(專門店)
稚内市港一丁目6-28 副港市場 波止場横丁(小店:星期一休息)
官網:http://www.s-garaku.com/s/index.php

 

3. 奧芝商店【客製化湯咖哩】

餐廳門口已經安排好大量坐位,等客人可以坐住等位,非常細心!(圖片來源:官網)

呢間餐廳超受遊客歡迎,喺全北海道都有超多分店,今次小編介紹嘅係「奥芝商店 駅前 創成寺」分店,距離札幌站只係3分鐘步程,非常方便!

隔住個mon都聞到陣香味!(圖片來源:官網)

奧芝商店當初就係因為獨家嘅海蝦湯咖哩而變成人氣餐廳,咖哩加入海蝦之後味道鮮甜,來到不妨試下(海蝦湯底需要加100円)!呢間餐廳點菜比較特別,由湯底、主菜、配料、米飯等全部都由客人選擇,每個客人變相可以「自製」獨有嘅湯咖哩,特別之餘又唔洗怕配料唔啱食,啱晒咀刁嘅朋友!

奥芝商店 駅前 創成寺
營業時間:11:00 – 22:00
地址:中央区北4条西1丁目1番地3 ホクレンビル地下1階
官網:https://www.facebook.com/2013souseiji/

 

4. 一文字咖哩店【北海道湯咖哩第一名】

餐廳環境好有西式cafe嘅感覺。(圖片來源:tabelog.com)

餐廳長期位於北海道咖哩排行榜嘅榜首,今年仲入選「2018年美食百名店」,而且已經係餐廳第二年入選百名店,湯咖哩嘅質素自然有保證!

蔬菜湯咖哩 1,150円(大約HK$80) (圖片來源:tabelog.com)

餐廳同樣將大量北海道嘅新鮮蔬菜放入湯咖哩中,不過呢間餐廳嘅做法比較特別,蔬菜同咖哩係分開煮熟,之後先將蔬菜放入咖哩,所以蔬菜特別爽口,配料有雞肉、煙肉、雞蛋等可以比客人自由選擇。

座位有限,要食湯咖哩記得早D來排隊!(圖片來源:tabelog.com)

呢間餐廳比較細間,得11個座位,但餐廳好受歡迎,通常未開舖已經有唔少人排隊,想試北海道第一名嘅湯咖哩記得早D來排隊喇!

營業時間:11:00~15:00(午餐)、17:30~21:00(晚餐)
地址:北海道札幌市白石区本通17-南2-4 ストーンビル本通17 1F

 

5. Rojiura Curry SAMURAI【分店限定菜色】

除咗一文字咖哩店,Rojiura Curry SAMURAI亦係日本人好鍾意去嘅湯咖哩餐廳,呢間餐廳亦都連續兩年入圍「年度美食百名店」,TABLEOG更高達3.63分,非常受歡迎!如果想去呢間餐廳食,記得要預早時間,因為通常都要排隊。

10月平岸総本店限定菜色:意大利風味炸雞湯咖哩 1,450円(大約HK$101) (圖片來源:官網)

Rojiura Curry SAMURAI喺北海道及東京都有分店,不過只有北海道地區先有每月限定菜色,限定菜色仲要每間分店都唔同!啱晒周圍走嘅遊客,可以去唔同分店試到更多菜色!

呢間餐廳同樣係由客人選擇湯底、辣度及飯量,不過湯底嘅選擇好特別,可以揀喺咖哩中加入豆漿或椰奶,味道貼近東南亞風味,加上湯咖哩必定會有嘅新鮮蔬菜,香味更有層次感,來到不妨試下!

Rojiura Curry SAMURAI. 平岸総本店
營業時間:11:00〜15:30(午餐)、17:30〜22:00(晚餐)
地址:北海道札幌市豊平区平岸3条3丁目2-3
官網:http://samurai-curry.com/

 

【閱讀更多】
【必睇必買必食】鄰近東京大阪北海道!5大日本天然溫泉及玩樂推介
【購物攻略】5大北海道必去購物景點!(內附優惠券)
【親子遊攻略】免費玩足全日!5大放電必去北海道親子公園推介