【必睇必買必食】鄰近東京大阪北海道!5大日本天然溫泉及玩樂推介

0
2414

冬天咁凍最啱浸溫泉,邊度嘅溫泉係最正?小編嚴選咗5大連日本人都好鍾意去嘅溫泉區,包括北海道、九州等,有D溫泉區仲要同港人常去嘅東京、大阪超級接近!除咗浸溫泉、睇靚景,小編仲話埋比你知有咩必食菜色及必買手信,想去浸溫泉嘅你記得bookmark喇!

1. 草津温泉(東京近郊)

溫泉水嘅蒸汽不停升上來,睇落好似人間仙景!(圖片來源:kusatsu-onsen.ne.jp)

草津温泉位於關東嘅群馬縣,距離東京2至4個鐘車程,係日本三大溫泉之一,已經連續15年被選為「日本溫泉100選」嘅第一名,所以唔淨止遊客,每年都有唔少日本人慕名而來,好受歡迎!草津温泉嘅人氣帶動附近地區嘅發展,區內有超過50間傳統溫泉旅館,來到草津一定要浸個溫泉先走呀!

必買:溫泉汽水(本多みやげ店)

由溫泉水整嘅汽水,你又飲過未?(圖片來源:官網)

呢個汽水係用群馬縣嘅天然水整成,而且係本店限定,其他地方買唔到架!來到一定要買來試下!

營業時間:9:00~21:30(全年無休)
地址:群馬縣吾妻郡草津町草津110
官網:http://www.kusatsu-honda.com/

必食:蕎麥麵

蕎麥麵用人手整,口感更加好食!(圖片來源:官網)

草津温泉附近有超多手打蕎麥麵嘅店舖,例如上州麺処平野家、そばきち 湯畑店、うし代亭等,一定唔可以錯過!

住宿:草津溫泉宿EIDA屋 (Kusatsu Onsen Yado EIDAYA)

呢間係附有天然溫泉嘅客房,想幾時浸溫泉都得,夠晒寫意!(圖片來源:官網)

呢間係傳統日式溫泉旅館,距離草津溫泉只係5分鐘步程,旅館內設有露天溫泉,最啱玩完一日返旅館浸溫泉好好放鬆下!旅館仲好接近滑雪場,冬天去就可以去玩埋雪上活動!

地址:群馬縣吾妻郡草津町464-285 Kusatsu 377-1711
價格:雙人房HK$688起
訂房網址:https://l.flynow.hk/b43d6

 

2. 指宿溫泉(九州鹿兒島)

海天一色超靚!(圖片來源:seika-spc.co.jp)

指宿溫泉係鹿兒島出名嘅觀光勝地,附近有好多溫泉例如摺濱溫泉、彌次湯溫泉、二月田溫泉等。

砂浴嘅效率比一般浸溫泉快3至4倍,難得來到一定要試!(圖片來源:官網)

除咗常見浸喺熱水入面嘅溫泉,呢度仲有比較特別嘅「砂浴」,即係將用溫泉水蒸熱嘅黑砂蓋係身上,只係焗10分鐘就會流汗,將身體嘅廢物排出,聽講效率比一般浸溫泉快3至4倍!「砂浴」喺其他地方比較少見,來到一定要試下!

必買:蚕豆甜品

蚕豆雪糕嘅包裝感覺好懷舊!(圖片來源:官網)

指宿係日本蚕豆生產量最多嘅地方,來到一定要試下各式各樣用當地蚕豆整嘅甜品,例如蚕豆曲奇、蚕豆雪糕(岡村商店)等。

岡村商店
營業時間:10:00~20:00(星期日及假期休息)
地址:〒891-0405 鹿児島県指宿市湊1-2-13
官網:http://www.okamuras.com/

必食:溫泉蛋豬肉蓋飯

用指宿溫泉水整嘅雞蛋,得呢度先食到架咋!(圖片來源:官網)

指宿嘅溫泉蛋非常出名,有好多餐廳都會提供有溫泉蛋嘅料理,呢度溫泉蛋最特別嘅地方係所有蛋都係用指宿溫泉水悶煮,味道特別,值得一試!

住宿:指宿白水館 (Ibusuki Hakusuikan Ryokan)

酒店外有個好靚嘅泳池,影相呃like嘅最佳位置!(圖片來源:agoda)

呢間係日本古式風格嘅溫泉酒店,距離JR指宿站7分鐘車程,佢曾經榮獲日本溫泉旅館業百選總合排行第10名,係好受歡迎嘅酒店!呢間酒店嘅房間可以望到好靚嘅海景,設施除咗有露天溫泉、大浴場,仲可以試到指宿最出名嘅砂浴!

地址:〒891-0404鹿児島県指宿市東方12126-12
價格:雙人房(包早餐)HK$1440起
訂房網址:https://l.flynow.hk/8c528

 

3. 有馬溫泉(神戶:鄰近大阪)

呢兩個係神戶最出名嘅溫泉,認住個門口,到時就唔洗擔心搵唔到!(圖片來源:letsgojp.com)

有馬溫泉位於神戶,距離大阪只係1個鐘車程,所以好多人去大阪旅遊都會去埋神戶玩。來到神戶一定要去有馬溫泉,呢個溫泉係日本三大古湯之一,亦係世界少有多達7種成分嘅溫泉,如果只係去神戶玩一日嘅話,一定要試下浸最出名嘅「金之湯」及「銀之湯」,兩個溫泉都有療養成分,對身體好好架!

必買必食:碳酸煎餅

煎餅聽落油膩,不過呢隻煎餅無加任何添加物,好健康!(圖片來源:官網)

碳酸煎餅係有馬好出名嘅手信,明治時期由「三津森本舖」嘅創辦人發明,已經有好多年歷史,碳酸煎餅無加奶油、雞蛋或者任何添加物,係比較健康嘅食品,喺本舖仲可以見到店員現場烘烤煎餅嘅過程,一定要去試下!

三津森本舖
營業時間:8:00~19:00
地址:神戶市北區有馬町809
官網:http://www.tansan.co.jp/

住宿:有馬溫泉兵衛向陽閣 (Arima Spa Hyoe Koyokaku)

呢個露天風呂喺客房入面,行咗成日來浸一浸,加埋咁靚嘅自然風景,肯定好治癒!(圖片來源:官網)

呢間係有700年歷史嘅傳統日式溫泉旅館,距離有馬溫泉站只係5分鐘步程,訂房間嘅時候可以揀附有早餐及晚餐嘅方案,可以食到超正嘅懷石料理或神戶牛,呢間酒店仲可以預訂私人露天溫泉,一個人霸晒成個溫泉肯定好享受!

地址:日本神戶市北區有馬町1904
價格:雙人房HK$2070起
訂房網址:https://l.flynow.hk/f3c3b

 

4. 登別溫泉(北海道)

溫泉嘅蒸汽配埋山景真係超靚!(圖片來源:官網)

北海道係日本第二大溫泉區,擁有超多天然溫泉,其中登別溫泉仲持續榮登每年日本溫泉排名前十名內,人氣超高!登別溫泉被山包圍,去睇溫泉仲可以見到超靚嘅山水自然景色,如果想去北海道浸溫泉,一定要去登別!

必買:熊饅頭(ベア観光)

饅頭嘅包裝上面有可愛嘅熊仔圖案,小朋友都鍾意!(圖片來源:at-ml.jp)

來到咁出名嘅溫泉區當然要試下呢度嘅溫泉饅頭!熊饅頭由手信舖「ベア観光」製作,已經有50年歷史,饅頭餡料由沖繩黑糖及北海道紅豆混合製成,口感軟綿,一推出已經大受歡迎,而家已經成為登別嘅代表手信,來到登別一定要買返個!

營業時間:7:00~19:00
地址:登別市登別温泉町50

必食:登別閻魔炒麵

呢個菜色係2015年先創製,不過好快已經成為人氣登別美食,連大胃王比賽都揀呢個來做比賽!麵條係由北海道生產嘅小麥製成,口感彈牙,醬汁微辣,配料用登別生產嘅海鮮或肉類做食材,材料非常新鮮!其中比較受歡迎嘅餐廳「溫泉市場」更加會用鐵板炒麵,令味道更加香氣四溢。

温泉市場
營業時間:11:30~21:00
休息日:12月中~年末休業
地址:登別市登別温泉町50
官網:http://www.onsenichiba.com/kaisen-sumiyaki.html

住宿:登別望樓NOGUCHI飯店 (Boro Noguchi Noboribetsu Hotel)

房間空間感十足,同時開幾個大行李箱都無問題!(圖片來源:官網)

呢間飯店位於登別市中心,係比較現代化嘅溫泉飯店,房間大,房內設有私人風呂,想幾時浸溫泉都得!停車場免費,啱曬去北海道自駕遊嘅旅客!不過飯店只限13歲以上人士入住,如果帶住小朋友親子遊嘅旅客就唔好揀呢間喇!

地址:登別市登別温泉町200番地1
價格:雙人房(包早餐及晚餐)HK$4016起
訂房網址:https://l.flynow.hk/19f8b

 

5. 黒川温泉(九州熊本)

日本古式建築通常會諗起京都,但其實熊本縣都可以見到!(圖片來源:官網)

黒川温泉被稱為日本嘅秘境溫泉,位於阿蘇山嘅北部,距離熊本市中心1個半鐘車程,溫泉被深山包圍,可以見到好靚嘅自然景色,而且附近嘅建築物都係江戶時期嘅木造古式建築為主,可以趁機感受下古色古香嘅日本。

必買:入湯手形【超抵玩溫泉套票】

呢個木牌除咗可以當手信攞走,亦可以放喺「地藏堂」許願。(圖片來源:官網)

入湯手形類似浸溫泉嘅套票,一個連稅1,300円(大約HK$91),只要出示入湯手形就可以由28間黑川溫泉旅館中揀3間溫泉來浸,有效期係半年,有D旅館仲會贈送小禮物添!浸完溫泉後,職員會喺入湯手形上蓋印,浸晒3個溫泉後仲可以當係紀念品攞返屋企,又玩又拎最開心!

印有熊本熊嘅入湯手形非常可愛!(圖片來源:官網)

入湯手形亦有小朋友嘅版本,一個連稅700円(大約HK$49),比3歲至小學六年級學生用,功能同大人版嘅入湯手形一樣。其實浸一個溫泉起碼都要500円,1,300円就可以浸3個溫泉真係好抵玩!而且黑川溫泉旅館嘅露天溫泉環境好靚,想浸溫泉嘅你記得買返個!

購買地點:黑川溫泉內嘅溫泉旅館或遊客中心「風の舎」

風の舎
營業時間:10:00~18:00
地址:熊本県阿蘇郡南小国町満願寺6594-3

必食:馬肉刺身

未試過食馬肉嘅人,可以來挑戰下!(圖片來源:官網)

馬肉係熊本縣嘅特色食材,來到一定要試下!如果唔敢食生馬肉亦都可以試下其他用馬肉整嘅菜色,例如馬肉可樂餅等。

味処 なか
營業時間:11:00〜22:00
地址:熊本県阿蘇郡南小国町大字満願寺黒川6600-2

住宿:黑川溫泉瀨之本館夢龍膽 (Yumerindo)

好和風嘅建築,想試下日式生活一定要來住一晚!(圖片來源:官網)

呢間旅館交通非常方便,距離黑川溫泉巴士站只係5分鐘步程,房間係傳統日式風格,鋪有日式疊疊米。旅館除咗有共用嘅大浴場及露天溫泉外,亦有私人溫泉可以比住客免費預約,來到一定要浸個溫泉先走!

地址:熊本県阿蘇郡南小国町満願寺6430-1
價格:雙人房(包早餐)HK$1732起
訂房網址:https://l.flynow.hk/4049b

懶人之選:黑川溫泉與阿蘇山一日遊

可以咁近距離睇火山真係超正!(圖片來源:klook)

熊本縣除咗黑川溫泉外,阿蘇火山亦都好出名,想一次過睇晒兩個景點,又唔想煩交通,參加一日團就最方便,工作人員仲會話你知咩角度影相最靚!

預訂網址:https://l.flynow.hk/klooke3665

 

【閱讀更多】
【任摘任食秋季水果】HK$46無限時任食! 大阪福岡東京超正果園推介
【日本超正住宿】晚晩免費宵夜放題!大阪福岡性價比高酒店推介